Лазерлік көруді түзетуге қарсы көрсетілімдер

Лазерлік көруді түзету (ЛАСИК және оның түрлендірілген әдістері) – аз инвазиялық тәсіл болып табылады, бұл кезде тек қасаң қабық тіндері қолданылады. Бұл асқынулардың даму қаупін азайтуға және көруін қалпына келтіре алатын пациенттер шеңберін кеңейтуге мүмкіндік береді. Алайда бұл операция барлық адамға бірдей жарай бермейді. Лазерлік көруді түзетуге бірқатар қарсы көрсетілімдер бар.

ЛАСИК-ке қарсы көрсетілімдер

Бұл топқа операцияның сапалы орындалуына әсер ететін және операциядан кейінгі асқынулар қаупін едәуір арттыратын ауыр соматикалық және психикалық аурулар жатады. Оларға мыналар кіреді:

• декомпенсацияланған жүйелік аурулар (коллагеноздар);
• ауыр ағымдағы қант диабеті;
• шашыраңқы склероз;
• жедел жұқпалы аурулар;
• жедел психотикалық жағдайлар және дәрі-дәрмекпен түзетуге келмейтін басқа да аурулар;
• қасаң қабықтың дегенеративті және дистрофиялық үдерістері;
• катаракта (сатысына байланысты);
• иридоциклит және көздің басқа да қабыну аурулары;
• анамнездегі торқабықтың ажырауы;
• прогрессиялайтын миопия;
• глаукома.

Лазерлік көруді түзету операциясына басқа да қарсы көрсетілімдер:

• 18 жасқа дейінгі жас;
• қасаң қабық тіндерінің қалыңдығы 450 мкм-ден аспауы;
• жүктілік және бала емізу кезеңі;
• жалғыз көз.

Жасқа байланысты шектеулер 18 жасқа дейін ағза мен тіндердің, соның ішінде көз алмасының өсуімен түсіндіріледі. Бұл кезеңде көздің өлшемдері өзгеріп, соған сәйкес көздің мөлдір ортасының сындыру қабілеті де өзгеруі мүмкін. Сондықтан 18 жасқа дейін ЛАСИК жасау көру үшін болжап болмайтын салдарға әкелуі ықтимал.