КАТАРАКТА – көз бұршағының затының немесе капсуласының әртүрлі дәрежеде бұлдырлануымен сипатталатын офтальмологиялық патология. Бұл жағдай көрудің төмендеуімен қатар жүреді.
Көз бұршағындағы бұлдырлану әртүрлі жаста пайда болуы мүмкін және оған түрлі факторлар әсер етеді: ағзаның қартаюы, химиялық заттар, ультракүлгін сәулелер, иондаушы сәулелену, қабыну үдерістері, зат алмасу және иммундық бұзылыстар, көздің ішкі қабықтарының аурулары, соққы алу, көздің еніп жарақаттануы және басқа да себептер.
Катарактаның белгілері:
заттардың қосарланып көрінуі;
көз алдында «шыбындар» немесе қалқып жүретін дақтардың пайда болуы;
мәтін мен фон арасындағы контрасттың бұзылуына байланысты оқудың қиындауы;
көзілдірікті шешкің келуі.
Аурудың бастапқы кезеңінде көру сапасы әдетте айтарлықтай төмендемейді. Бұл кезең 1–3 жылдан 10–15 жылға дейін созылуы мүмкін. Диагноз науқастың көрудің нашарлауына қатысты шағымдарына және көруді тексеру нәтижелеріне негізделіп қойылады. Катарактаны көз тамшылары арқылы консервативті емдеу көп жағдайда тиімді емес. Катарактаны емдеудің жалғыз жолы – бұлдырланған көз бұршағын хирургиялық жолмен алып тастау. Операциядан кейін сіз қалыпты өмір салтыңызға қайта орала аласыз: жұмыс істеу, оқу, теледидар көру. Катарактаны жоюды тәжірибелі офтальмолог орындайды және бұл қарапайым, жылдам әрі қауіпсіз операция болып саналады.
ГЛАУКОМА – мұқият тексеруді және шұғыл түрде қажетті ем тағайындауды талап ететін ауру. Себебі ол көрудің төмендеуіне әкеліп, соқырлыққа ұласуы мүмкін.
Глаукоманың алғашқы белгілері:
ымыртта және түнде көрудің нашарлауы;
жарық көздерінің айналасында кемпірқосақ түсті шеңберлердің көрінуі;
көзде ауырлық, кернеу сезімі;
жалған жас ағу сезімі;
алысты да, жақынды да көру үшін көзілдірікті 3 жылда 1 реттен жиі ауыстыру қажеттілігі.
ҚИСЫҚ КӨЗДІЛІК (КОСОГЛАЗИЕ) – көру осьтерінің қаралып отырған нысан бағытына сәйкес келмеуі, соның салдарынан көздердің үйлесімді жұмысы бұзылып, екі көзбен бір нысанды дәл көру қиындайды.
Қисық көзділіктің себептері әртүрлі болуы мүмкін: туа біткен немесе жүре пайда болған.
Қисық көзділікті емдеудің бірнеше тәсілі бар: терапиялық және хирургиялық. Оларға плеоптикалық, ортоптикалық және диплоптикалық емдеу әдістері жатады.
